Европско првенство во кошарка, Белград

   (септември 2005 г.)

      Кошаркарската репрезентација на Специјалната Олимпијада - Македонија постигна уште еден забележителен успех на меѓународен план. На 2005 Европското првенство во кошарка на Специјалната Олимпијада, што се одржа од 6 до 11 септември во Белград, СиЦг, нашата репрезентација освои златен медал во својата група/дивизија, со што се квалификува за погорната Б-дивизија за следното првенство. Во конкуренција од 23 земји од цела Европа, ова е извонреден успех за нас. Во финалните натпревари ги победивме Шпанија со 24:6 и Луксембург, 16:12, а пред тоа, во квалификациите изгубивме од Турција.

      Делегацијата на Специјалната Олимпијада - Македонија ја сочинуваа 13 лица: 9 атлети (од кои 1 помошник тренер), 1 главен тренер, втор помошник тренер, водач на делегацијата, како и кооординаторот за кошарка кој беше учесник на семинарот за кошарка. Важно е да се истакне дека репрезентацијата на СО Македонија беше составена од спортисти од цела Македонија (Кавадарци, Прилеп, Скопје и др.), при што строго водевме сметка да се почитуваат принципите и заложбите на меѓународната Специјална Олимпијада за рамноправно, пропорционално учество на лицата со умерени пречки во развојот (а, не само ”полесните”).

      Заради доследното почитување и спроведување на мисијата и принципите, бевме посебно издвоени од меѓународниот организациски одбор и добивме посебна статуета на СОЕА (Специјална Олимпијада Европа-Евроазија), која ни ја врачи Директорот на СОЕЕА од Брисел, Госп. Мајкл Смит. Во таа пригода тој ги истакна успесите на Специјалната Олимпијада Македонија и експлицитно нагласи дека Македонија треба да биде горда на својата национална програма!

< претходен настан  |  галерија  |  нареден настан >