Европска недела во кошарка

   (декември 2004 г.)

 

 

      За прв пат, на пан-европско ниво и во партнерство со ФИБА Европа, европските национални програми на Специјална Олимпијада реализираа сеопфатни и координирани активности насочени кон еден многу интересен спорт - кошарката, спорт кој за жал на многумина, не го добивал местото што навистина го заслужува.

 

      Со особено задоволство сакаме да истакнеме дека и ние, на ниво на цела Република, презедовме соодветни програм-ски активности за поголема популаризација на овој спорт помеѓу лицата со ментален хендикеп и нивно активно вклучување во тренажен и натпреварувачки процес. При тоа, покрај групата на волонтери и тренери што биле вклучувани и во други спортови, особено е значајно што активно се вклучија многу сегашни и бивши кошаркари и други спортски работници (д-р Васил Тупурковски, д-р Драгољуб Арсов, Пеце Наумовски, Ѓорѓи Војновиќ, Јорданчо Давитков и др.), како и цели аматерски и професионални тимови. Соодветен придонес дадоа и големиот број судии (помеѓу нив и со ФИБА лиценца), експерти и други официјални лица, како и студенти од факултетите за дефектологија и физичка култура.

 

      Наедно, со формалното потпишување на посебни повелби со Македонскиот Олимписки Комитет, Факултетот за физичка култура и Кошаркарската федерација на Македонија, беше искажана несомнената готовност на етаблираните институции за системска и институционална поддршка и помош на Специјалната Олимпијада Македонија во сите насоки на правилна реализација на зацртаните планови и општата мисија.

 

      Официјално, оваа манифестација отпочна во ноември со одигрување на поединечни натпревари помеѓу екипи од СО Македонија како и присуство на различни кошаркарски натпревари. Одбележувајќи ја двегодишнината од формалното постоење на СОМ во Македонија на 17 декември 2004 г. во спортската сала “Јане Сандански” во Скопје се одржа и еден посебен, голем кошаркарски турнир.

 

      Учество на овој турнир зедоа 16 екипи од цела Македонија, вклучувајќи преку 200 атлети - спортисти на СО Македонија, како и партнери - други кошаркари, предводени од младинската екипа на МЗТ Скопје. Покрај нив, во придружните програмски активности, учествуваа и голем број на други лица со интелектуална попреченост, пријатели, доброволци, естрадни ѕвезди, членови на фамилии и други поддржувачи.

 

 

< претходен настан  |  галерија  |  нареден настан >

   

  Специјална Олимпијада Македонија © Сите права се задражани 2006.